Category Archives: Gastronomía

Yolanda Castaño e Andrea Costas

Cociñando ao pé da letra

Galaxia, Vigo, 2011, 184 páxinas, 22 €

Ben sabido é que a gastronomía e a literatura compartiron, en moitas ocasións, longas e celmosas singraduras. Desde o célebre Picadillo en diante, quen non lembra a feliz confluencia entre letras e cociña en casos como os que simbolizan pezas de Álvaro Cunqueiro, Castroviejo, Néstor Luján, Xavier R. Baixeras e tantos outros. Neste ronsel cómpre situar un libro que incorpora unhas magníficas, e en tantos casos sorprendentes, fotografías de Andrea Costas, un dos esteos fundamentais do proxecto pois con elas percórrense visualmente algo máis  que a imaxe de quen nos fala dos pratos e da súa preparación: nelas  cífrase, é doado advertilo, a personalidade de todos e cada un dos convidados, obtendo un resultado tan suxestivo como atractivo.

O volume, non se dixo aínda, coordínao Yolanda Castaño,  responsable do limiar e duns medidos e acaídos apuntamentos biográfico-culinarios previos, quen convidou a máis dunha vintena de autoras e autores galegos que van de Anxos Sumai a Helena Villar Janeiro, de Chus Pato a Xosé Mª Álvarez Cáccamo, de Agustín Fernández Paz a María Reimóndez, de Marica Campo a Marga Doval por só citar algúns nomes. Todos e todas pertencentes a moi diferentes xeracións, formacións, espazos xeográficos vitais ou xéneros practicados dentro da literatura galega contemporánea, para que compartisen cos lectores receitas e procesos de preparación dun prato, pero non só.

         Cada un dos literatos-gastrónomos aquí retratados non se limita a transmitir receitas: descríbeas libérrimamente, obviando a linguaxe técnica ou críptica para construír microtextos que van máis alá do que atinxiría aos ingredientes, ás súas combinacións e á preparación do prato pois todo se conta “literariamente”,  desde diversas perspectivas e sensibilidades: ensaio, ficción, teatro…,  que  transparentan, e moi nidiamente, esa vontade de traspasar os límites do continxente para ofreceren textos literarios con vontade de permanencia.

   Cociñando ao pé da letra  subtitúlase “entra na literatura galega… ata a cociña” e posúe, deste xeito, esoutro valor tan necesario e preciso nestes tempos que é o de visibililizar e achegar un feixe de escritores e escritoras de noso a nós mesmos, facéndoo desde unha perspectiva cotiá, case íntima e subliñando por extensión os vincallos posibles entre a escrita e a cociña… Unha feliz iniciativa, que contaxia optimismo e que resulta esteticamente moi conseguida. Bo apetito e boa lectura!

(Presentación no Festigal 2011: Francisco Castro,

Andrea Costas, Yolanda Castaño e Marga do Val)   

Esta reseña publicouse o 20 de agosto de 2011, nas páxinas do suplemento «Culturas» de La Voz de Galicia, baixo o título de «Para ler e comer polos ollos».