Category Archives: internet

Arturo Casas

Alusión

Galaxia, Vigo, 2011, 160 páxinas, 19 €

Talvez non sexa moi correcto sinalalo nun texto como o presente mais non quero ocultar que gardo un grande aprecio pola persoa de Arturo Casas e non é menor a miña admiración polo traballo teórico-crítico que vén desenvolvendo desde hai anos, sobre todo a través das múltiples publicacións e ensaios que constitúen, hoxe por hoxe, unha das achegas máis rigorosas feitas, desde a perspectiva ensaística, á intepretación das liñas de forza do noso sistema literario, con especial atención á análise semiótica e cultural.

Por todo o dito saúdo con moito agrado a publicación dunha escolma significativa dos seus numerosos apuntamentos e comentarios vertidos no blogue Lándoas, que estivo activo ao longo dos anos 2008 e 2009 e que moitos e moitas seguimos con interese no seu día. A semántica plural presente no título de Alusión explícase en diversas claves: por suposto que unha delas é a que «alude» ao sistema de posibles referencias cruzadas no seo da blogosfera mais tamén  ao fondo do seu sentido: «a angostura do espazo democrático no tempo noso e as alusións correlativas que iso ocasiona na esfera pública», como sinala lucidamente a súa prologuista, de nome  Felicia Soutelo, quen alén de exhibir un rexistro narrativo envexable, un chisco irónico e extraordinariamente documentado, non sei se entender como heterónimo, ou case.

Se o prólogo resulta de lectura obrigada outro tanto se pode dicir deste exercicio de reapropiación lectora, que algúns sentimos saudosa pero non periclitada. Velaquí estas «lándoas», agora en forma de papel, que convidan a ler, a reler, a gorentar propostas textuais nadas nas marxes que agora xa non son marxinais nin periféricas; moi ao contrario preséntanse reforzadas como centrais e substanciais ao falaren sobre as identidades, sobre as manipulacións e os medios de comunicación, sobre os disfraces do poder…, reflexións tan necesarias, sempre, adobiadas por veces cunha sutil ironía. Un libro ben preciso sempre e moito máis nesta na época que estamos a vivir.