Category Archives: Libro lecer

VV.AA.

A Ramallosa. Caligrafías de luz

Arraianos, Celanova, 2011, 40 páxinas

Hai ben de tempo que reservo un comentario para este volume, requintadamente editado pola Asociación Arraianos,  titulado A Ramallosa. Caligrafías de luz, e cómpre que non conclúa o ano sen dar conta del por moitas razóns. Unha delas foi a xa amentada, isto é, o estupendo traballo de edición ao que foi sometido, mais tamén ben o merece por popularizar e divulgar a existencia dunha singular procesión laica que ten lugar, desde hai máis de vinte e cinco anos, na Ramallosa de Celanova: unha procesión turna na que se fai ostentación de ramallos, acompañados de farois  escintiilantes, música e sempre alegría.

      Mendez Ferrín, autor dunhas liñas limiares, pregúntase se a orixe do festexo estaría no combate entre luces e sombras, se sería unha homenaxe á Natureza  ou se viría sendo unha evocación pagá dos defuntos celanovenses… Non ofrece resposta  definitiva nin serei eu quen a dea pois a festa é a que é, e talvez non sexa preciso preguntarse máis.  Falo aquí da publicación que, para min, xa beirea as contornas da bibliofilia e na que se atopa, ademais, un pequeno e documentando ensaio explicativo a cargo de Aser Álvarez e mais un vizoso, en ocasións espectacular,  diálogo caligráfico-poético-fotográfico que sosteñen con intensidade efectiva Baldo Ramos e Carlos Lorenzo, responsables destas seccións redondeando o que xulgo como  un cativador artefacto que  xa atesouro no espazo dos afectos con agarimo e admiración.