Category Archives: Varios

Hoxe, a carón dun conxunto de colegas de profesión e mais outras persoas da comunidade docente na que traballo, todas unidas polo interese na lectura, gozamos dun agasallo como foi a visita de Begoña Caamaño. Non coñecía persoalmente a Begoña, malia termos amizades comúns, mesmo certas orixes xeográficas parellas, e só falara con ela a través do teléfono mais xa captara, non resulta difícil, un engado persoal pouco común.  Begoña é unha muller transparente, exprésase con sinxeleza  e  defende con simpatía e rotundidade as súas conviccións literarias e persoais, coas que é difícil non estar de acordo. Iluminounos sobre o seu persoal proceso de escrita, arredor da xestación de Circe e mais de Morgana en Esmelle -esas dúas novelas que non canso de recomendar-, falou das claves da súa concepción do que é a literatura: a revisión dos mitos, a súa deconstrución, a sororidade… Compartiu, con xenerosidade, un tempo que nos soubo a pouco.

Cada vez estou máis convencido do enorme talento creativo que atesouran algunhas persoas que escriben no noso idioma, cando este cadra cunha postura tan afastada da vaidade e tan garimosamente próxima,  un séntese privilexiado por coñecelas. Grazas Begoña.